Kryengritje në pallat

Ky libër ka personazhe të çuditshme. Këtu takohen e bisedojnë me njëri-tjetrin, si në ëndërr, djem e vajza me trup, me kokë, me gojë, me sy e me veshë, si të gjithë njerëzit e gjallë, si dhe copa letrash të prera nga revistat e kalamajve, kukulla e lodra të tjera, që fëmijët i hedhin dhe i harrojnë në ndonjë qoshe. Po si bisedojnë e si merren vesh me njëri-tjetrin?...

Është e vërtetë, ditën kukullat dhe vizatimet nuk flasin… Por natën, ku u dihet? Natën të gjithëve na zë gjumi për shtatë palë qejfe dhe nuk dëgjojmë e nuk marrim vesh se ç’bëhet në shtëpitë tona e nëpër qytet me këto lodrat e kalamajve.

Kështu fillon historia e kryengritjes, që ndodh në një pallat nëntëkatësh në zemër të Tiranës. Po pse ndodhi kjo kryengritje dhe cilët ishin kryengritësit? Këtë do ta mësoni duke shfletuar brendinë e këtij libri dhe do të njihni edhe heronjtë e kësaj historie, Qetësor-diktatorin, Erlet-mendjelehtin, Dasantilën etj.